दिल्ली विधानसभा निवडणुकीत भाजपच्या मुख्यमंत्रिपदाच्या उमेदवारीची माळ माजी आयपीएस अधिकारी किरण बेदी यांच्या गळ्यात पडणार, असे स्पष्ट संकेत मिळत असले तरी, राष्ट्रीय स्वयंसेवक संघात त्यावरून काहीसा नाराजीचा सूर ऐकू येतोय. खुद्द संघाचे सरसंघचालक मोहन भागवत यांनाच, मुख्यमंत्रिपदाची उमेदवारी बेदींकडे देणं मान्य नसल्याचं सूत्रांकडून समजतं. त्यामुळे येत्या काळात या मुद्द्यावरून भाजपश्रेष्ठी विरुद्ध संघश्रेष्ठी असा संघर्ष पाहायला मिळू शकतो.
'टीम अण्णा'च्या धडाडीच्या कार्यकर्त्या आणि नंतर काही काळ अरविंद केजरीवालांसोबत काम केलेल्या किरण बेदी यांनी दोनच दिवसांपूर्वी भाजपमध्ये प्रवेश केला. दिल्ली विधानसभा निवडणुकीच्या पार्श्वभूमीवर या पक्षप्रवेशाला वेगळंच महत्त्व आहे. केजरींना 'टफ फाइट' देण्यासाठी, त्यांच्याच माजी सहकाऱ्याला फोडून भाजपनं 'आप'ला धक्का दिला आहेच, पण बेदींच्या रूपानं मुख्यमंत्रिपदाच्या उमेदवाराचा प्रश्नही सोडवल्याचं राजकीय वर्तुळात बोललं जातंय. अर्थात, तशी औपचारिक घोषणा भाजपनं केलेली नाही, पण केजरीवाल यांच्याविरुद्ध लढण्यास आपण सज्ज असल्याचं सूचक वक्तव्य बेदींनी केलंय.
या सगळ्या हालचालींनी दिल्ली भाजपच्या जुन्या नेत्यांमध्ये काहीशी अस्वस्थता पसरली आहे. 'कानामागून आली अन्...' अशी कुजबूज त्यांच्या गोटात ऐकू येत असतानाच, बेदींना सीएमपदाची उमेदवारी देण्याबाबत राष्ट्रीय स्वयंसेवक संघही फारसा अनुकूल दिसत नाहीए. सरसंघचालक मोहन भागवत यांनी तर, बेदींच्या नावाची औपचारिक घोषणा झाली आहे का, हेही भाजप नेत्यांना विचारून घेतलंय.
मध्य प्रदेशातील सागर जिल्ह्यात संघाची बैठक सुरू आहे. तिथे मोहन भागवतही उपस्थित आहेत. किरण बेदींनी भाजपमध्ये प्रवेश केल्याचं वृत्त कळताच त्यांनी आनंद व्यक्त केला. पण, भाजपच्या मुख्यमंत्रिपदाच्या उमेदवार बेदीच असतील, हे ऐकून ते थोडे चिडलेच होते, असं संघातील सूत्रांकडून कळतं. कुठल्या नेत्यानं हा निर्णय घेतलाय, याबाबतही त्यांनी लगेचच विचारणा केली. त्यावर, ही प्रसारमाध्यमांनी पसरवलेली चर्चा आहे, पक्षानं अद्याप त्याबाबत कुठलीही घोषणा केली नसल्याचं भाजपकडून स्पष्ट करण्यात आलं. ते कळल्यावर भागवत थोडे निश्चिंत झाल्याचं त्यांच्या निकटवर्तियांनी सांगितलं.
त्यामुळे आता भाजप मुख्यमंत्रिपदाची उमेदवारी कुणाला देणार, संघाला मान्य नसतानाही किरण बेदींनाच उमेदवार करणार का, की भागवतांची मनधरणी करणार, हे पाहणं महत्त्वाचं ठरणार आहे.
No comments:
Post a Comment