वरिष्ठ पत्रकार नलिनी सिंह यांनी पोलिसांना दिलेल्या माहितीमुळे सुनंदा पुष्कर हत्येप्रकरणी माजी केंद्रीय मंत्री आणि काँग्रेस खासदार शशी थरूर यांच्या अडचणीत भर पडली आहे. शशी थरूर हे पाकिस्तानी पत्रकार मेहर तरार हिच्याबरोबर दुबईत तीन दिवस राहिले होते, अशी माहिती सुनंदाने मृत्यूच्या काही तासांपूर्वी आपल्याला दिली होती, असं नलिनी सिंह यांनी पोलिसांना सांगितलं. 'मी तुमच्याशिवाय जगू शकणार नाही', असं मेहरने थरूर यांना म्हटलं होतं, असंही सुनंदा यांनी नलिनी यांना सांगितलं होतं. आता या माहितीच्या आधारे पोलिसांचा तपास सुरू झाला आहे.
'सुनंदा पुष्कर यांना गेल्या तीन-चार वर्षापासून मी ओळखते. किमान एक वर्षापासून सुनंदा माझ्याशी आपल्या खासगी जीवनातले सुख-दुःख सांगत होती. तसंच किमान ६ ते ७ महिन्यापूर्वी सुनंदाने थरूर यांची तरारबद्दलच्या वाढत्या जवळकीबद्दलचं दुःख माझ्याकडे सुनंदाने व्यक्त केलं होतं', अशी माहिती नलिनी सिंह यांनी पोलिसांना दिली.
'जून २०१३ मध्ये थरूर आणि तरार तीन दिवस एकसाथ राहिले होते. सुनंदा यांना याची पक्की माहिती होती कारण दुबईत त्यांची चांगलीच ओळख होती. सुनंदा यांना मित्रांनी सर्व माहिती दिली होती. आणि आपल्याकडे सर्व पुरावे असल्याचं सुनंदा यांचा दावा होता. १६-१७ जानेवारी २०१४ ला रात्री १२ वाजून १० मिनिटांनी माझ्या मोबाइलवर सुनंदाचा फोन आला होता आणि ती रडत होती. शशी आणि तरार यांनी उत्तेजित करणारे असे रोमँटीक मेसेजेस एकमेकांना पाठवलेत, असं सुनंदाने मला त्यावेळी सांगतिलं होतं. लोकसभा निवडणुकीनंतर सुनंदाशी घटस्फोट घेऊन थरूर तरारशी लग्न करणार होते आणि तुमच्या शिवाय मी जगू शकणार नाही, असा मॅसेजही तरारने थरूर यांना पाठवला होता, असं सुनंदानी सांगितलं होतं. थरूर यांचे कुटुंबीयही तरारशी नातं जुळवण्यासाठी उत्सुक होते, असा आरोपही सुनंदानी केला होता अशी माहिती नलिनी यांनी पोलिसांना दिली आहे.
No comments:
Post a Comment